ലോക്സഭ തിരഞ്ഞെടുപ്പിനുള്ള നാമനിര്ദ്ദേശ പത്രിക പിന്വലിക്കുന്നതിനുള്ള സമയപരിധി അവസാനിച്ചതോടെ അന്തിമ സ്ഥാനാര്ഥി പട്ടിക തയ്യാറായി. സംസ്ഥാനത്തെ 20 മണ്ഡലങ്ങളില് 194 സ്ഥാനാര്ഥികളാണ് മല്സര രംഗത്തുള്ളതെന്ന് മുഖ്യതിരഞ്ഞെടുപ്പ് ഓഫീസര് സഞ്ജയ് കൗള് അറിയിച്ചു. തിങ്കളാഴ്ച 3 മണി വരെയായിരുന്നു സ്ഥാനാര്ഥിത്വം പിന്വലിക്കുന്നതിനുള്ള സമയപരിധി. സംസ്ഥാനത്താകെ 10 സ്ഥാനാര്ഥികള് പത്രിക പിന്വലിച്ചു.
കോട്ടയം മണ്ഡലത്തിലാണ് ഏറ്റവുമധികം സ്ഥാനാര്ഥികളുള്ളത്. 14 പേര് മണ്ഡലത്തില് ജനവിധി തേടും. ഏറ്റവും കുറവ് സ്ഥാനാര്ഥികള് ഉള്ളത് ആലത്തൂര് മണ്ഡലത്തിലാണ് (5 പേര്). കോഴിക്കോട് 13 ഉം കൊല്ലത്തും കണ്ണൂരും 12 വീതം സ്ഥാനാര്ഥികളുമുണ്ട്. സംസ്ഥാനത്താകെയുള്ള 194 സ്ഥാനാര്ഥികളില് 25 പേര് സ്ത്രീകളാണ്. പുരുഷന്മാര് 169. ഏറ്റവുമധികം വനിത സ്ഥാനാര്ഥികളുള്ളത് വടകര മണ്ഡലത്തിലാണ്. 4 പേര്.
തിരുവനന്തപുരം, മാവേലിക്കര, ഇടുക്കി, ചാലക്കുടി, തൃശൂര്, പാലക്കാട്, മലപ്പുറം, വയനാട്, വടകര എന്നിവിടങ്ങളിലാണ് സ്ഥാനാര്ഥികള് പത്രിക പിന്വലിച്ചത്. അന്തിമ സ്ഥാനാര്ഥി പട്ടിക തയ്യാറായതോടെ സ്ഥാനാര്ഥികള്ക്ക് തിരഞ്ഞെടുപ്പ് കമ്മീഷന് ചിഹ്നങ്ങള് അനുവദിച്ചു തുടങ്ങി. |