ലോകത്തില്‍ ഇന്നുവരെ ആരും പരീക്ഷിക്കാത്ത രീതിയില്‍ ഒരു ഭക്ഷണ വിഭവത്തെ ആധുനികവല്‍ക്കരിക്കാന്‍ ശ്രമിക്കുകയാണ് ജപ്പാന്‍കാര്‍. ജപ്പാനിലെ പരമ്പരാഗത ഭക്ഷണ വിഭവമായ ഒനിഗിരി റൈസ് ബോളുകളിലാണ് വിചിത്രമായ ഈ മാറ്റം വരുത്തുന്നത്. ജപ്പാനിലെ യുവതികളുടെ കക്ഷത്തിലെ വിയര്‍പ്പ് കൂടി ചേര്‍ത്ത് പരമ്പരാഗത ഭക്ഷണത്തെ മാറ്റാനാണ് ശ്രമം. ജപ്പാനിലെ ഏറ്റവും പഴക്കമുള്ള ലഘുഭക്ഷണങ്ങളില്‍ ഒന്നാണ് ഒനിഗിരി റൈസ് ബോളുകള്‍. പച്ചക്കറികളും മാംസവും രുചികരമായ രീതിയില്‍ സംയോജിപ്പിച്ച് അത് ഒരു റൈസ് ബോളില്‍ നിറച്ച് കൈപ്പത്തിയില്‍ വച്ച് ഉരുളകളാക്കിയാണ് സാധാരണയായി ഇത് ഉണ്ടാക്കി വന്നിരുന്നത്. എന്നാല്‍ ഇതില്‍ നിന്ന് വ്യത്യസ്തമായി കൈപ്പത്തിക്കുള്ളില്‍ വച്ച് ഉരുളകള്‍ ആക്കുന്നതിന് പകരം സുന്ദരികളായ യുവതികളുടെ കക്ഷത്തില്‍ വച്ച് ഉരുളകളാക്കി അത് വില്പനയ്ക്ക് എത്തിക്കാന്‍ ആണ് റെസ്റ്റോറന്റുകളുടെ ശ്രമം. യുവതികളുടെ കക്ഷത്തിലെ വിയര്‍പ്പ് കൂടി ഇതില്‍ ചേരുന്നതിനാണ് ഇങ്ങനെ ചെയ്യുന്നത്. കക്ഷത്തില്‍ വച്ച് യുവതികള്‍ ബോള്‍ ഉരുട്ടുന്നതിന്റെ ദൃശ്യങ്ങള്‍ ഇപ്പോള്‍ സോഷ്യല്‍ മീഡിയയില്‍ വൈറലാണ്.
വൈറലായ വീഡിയോയിലെ ദൃശ്യങ്ങള്‍ ഇങ്ങനെയാണ്, ഒനിഗിരി ഉണ്ടാക്കുന്നതിന് മുമ്പ്, ചേരുവകളുമായി സമ്പര്‍ക്കം പുലര്‍ത്തുന്ന എല്ലാ ശരീരഭാഗങ്ങളും അണുവിമുക്തമാക്കും. തുടര്‍ന്ന് യുവതികള്‍ വിയര്‍പ്പ് ഉണ്ടാകുന്നതിനായി അല്പസമയം വ്യായാമം ചെയ്യും. വിയര്‍ത്തു കഴിഞ്ഞാല്‍ കക്ഷത്തില്‍ വച്ച് ഒനിഗിരി ഉരുളകളാക്കി എടുക്കും. ഇത്തരത്തില്‍ ഉല്പാദിപ്പിക്കുന്ന ഒനിഗിരി ബോളുകള്‍ക്ക് ആവശ്യക്കാര്‍ ഏറെയാണെന്നാണ് സൗത്ത് ചൈന മോണിംഗ് പോസ്റ്റ് റിപ്പോര്‍ട്ട് ചെയ്യുന്നത്. അതുകൊണ്ടുതന്നെ ഇത് ചില റെസ്റ്റോറന്റുകളില്‍ സാധാരണ ഒനിഗിരി ബോളുകളെക്കാള്‍ 10 മടങ്ങ് അധിക വിലയിലാണ് വില്‍ക്കുന്നത്. എന്നാല്‍ ഇതിന്റെ രുചിയില്‍ വലിയ വ്യത്യാസമില്ല എന്നാണ് ഇത് കഴിച്ചവര്‍ പറയുന്നത്. അതേസമയം, വിചിത്രമായ പാചകരീതി സോഷ്യല്‍ മീഡിയയില്‍ ചൂടേറിയ ചര്‍ച്ചയ്ക്ക് വഴിയൊരുക്കിയിട്ടുണ്ട്.
